baja ki dushman-e-jan shahr-e-jan ke bahar hai
magar main us ko kahun kya jo ghar ke andar hai
tamam naqsh parindon ki tarah utre hain
ki kaghazon pe khile paniyon ka manzar hai
main ek shaḳhs jo kumbon men rah gaya baT kar
main musht-e-ḳhak jo taqsim ho ke be-ghar hai
shajar kaTa to koi ghonsla kahin na raha
magar ik uḌta parinda faza ka zevar hai
vo ḳhauf hai ki makin apne apne kamron men hain
vo haal hai ki bayaban men vus.at-e-dar hai
kahin bhi peḌ nahin phir bhi patthar aae hain
gali men koi nahin phir bhi shor-e-mahshar hai
main is vasi.a jazire men vahid insan huun
ki mere charon taraf dasht ka samundar hai
koi bhi ḳhvab na unchi fasil se utra
magar kiran ke guzarne ko rauzan-e-dar hai
tamam raushaniyan bujh gai hain basti men
magar vo diip ki jis ka havaon men ghar hai
kisi se mujh ko gila kya ki kuchh kahun ‘aḳhtar’
ki meri zaat hi ḳhud raste ka patthar hai
Leave a Reply