itvar ki dopahar to hamesha hi achchhi hoti hai
bilkul tumhari tarah
be-fikr be-parvah azad
main ne bhi hamesha ise apne hi tariqe se bitaya hai
par jaane kyuun
kuchh arse se jab bhi ye sukun bhara vaqt apne saath bitane ki koshish ki
tum dur-daraz ke vaqton se nikal ke chup-chap mere qarib baith jaate ho
mere hathon ki khuli kitab band kar ke
apne hi qisse sunane lagte ho
december ki sardi
barish ki bunde
aur itvar ki dopahar
vahi qissa jo tum ne jiya tha kabhi
mere saath
lag-bhag har hafte dohrate ho
aur mujhe ehsas bhi nahin hota ki main qaid huun
kuchh azad se lamhon men hamesha ke liye
Leave a Reply