tamam nur-e-tajalli tamam rang-e-chaman
ye tera chand sa chehra ye tera gul sa badan
na Dagmaga.e qadam garche rah-e-ulfat men
kahin the dasht-o-bayaban kahin the dar-o-rasan
hazar aa.e zamane men inqalab magar
mizaj husn ka badla na ishq hi ka chalan
sabat-o-sabr zaruri hai aadmi ke liye
shikan jabin pe na aa.e ba-vaqt-e-ranj-o-mehan
ye baat aur hai naqid rahe zamana magar
jahan se miT nahin sakte nuqush-e-tesha-fan
mira dayar hai mehr-o-vafa ka gahvara
adu-e-mehr-o-mohabbat ka hai magar madfan
haqiqaton se ba-har-hal jo gurez kare
vo sha.iri hai na hikmat na vo hunar hai na fan
har ik ko jaan zamane men apni pyari hai
aziz-tar hai magar ham ko jaan se bhi vatan
bahut hi shor tha rangini-e-jahan ka magar
mila na ham ko yahan kuchh siva-e-ranj-o-mehan
vo jan-e-husn-o-latafat hi ban ke aaya hai
bahar ghuncha-ba-ghuncha saba chaman-ba-chaman
hazar baar hua imtihan-e-ishq magar
na jaane husn hai kyuun mujh se bad-guman ‘darshan’
Leave a Reply