Wo Kab Aaen KHuda Jaane Sitaro Tum to so Jao

Qabil Ajmeri

vo kab aa.en ḳhuda jaane sitaro tum to so jaao

hue hain ham to divane sitaro tum to so jaao

kahan tak mujh se hamdardi kahan tak meri gham-ḳhvari

hazaron gham hain anjane sitaro tum to so jaao

guzar ja.egi gham ki raat ummido to jaag uTTho

sambhal ja.enge divane sitaro tum to so jaao

hamen rudad-e-hasti raat bhar men ḳhatm karni hai

na chheḌo aur afsane sitaro tum to so jaao

hamare dida-e-be-ḳhvab ko taskin kya doge

hamen luuTa hai duniya ne sitaro tum to so jaao

use ‘qabil’ ki chashm-e-nam se derina ta.alluq hai

shab-e-gham tum ko kya jaane sitaro tum to so jaao