rah-e-ḳhirad men jahan sar hai dard-e-sar bhi hai
ki gu-magu bhi agar bhi hai aur magar bhi hai
faqih-e-shahr muazzaz bhi mo’atabar bhi hai
magar marasim-e-ulfat se be-ḳhabar bhi hai
tiri nazar ki nazar bhi nahin nazar bhi hai
jise hamari ḳhabar bhi nahin ḳhabar bhi hai
yahan ki qaid se ghabra raha hai divana
ki is dayar men divar bhi hai dar bhi hai
jahan-e-ariz-o-gesu ajiib duniya hai
ki jis men shaam bhi hai saath hi sahar bhi hai
ye dil ki vadi-e-aiman men kaun aa utra
ki jo jamal-e-nahufta bhi jalva-gar bhi hai
jo raah ahl-e-ḳhirad ke liye hai la-mahdud
junun-e-jazba-e-ulfat men muḳhtasar bhi hai
Leave a Reply