kis se vafa ki hai umiid kaun vafa-shi.ar hai
ai mire be-qarar dil kis liye be-qarar hai
sun to rahe hain der se shor bahut bahar ka
jaane kahan khile hain phuul jaane kahan bahar hai
kyuun na tire ḳhayal men zamzama-ḳhvan guzar chalen
yuun bhi hamari raah men gardish-e-rozgar hai
raat se ham nahin udaas raat udaas hi sahi
raat to sub.h ke liye vaqfa-e-intizar hai
ab bhi mazaq-e-dard se meri shabon men hai gudaz
mere labon pe aaj bhi naghma-e-husn-e-yar hai
Leave a Reply