Har Ek Subh-E-Tamanna Ka Shahr Sajta Hai

Nashir Naqvi

har ek sub.h-e-tamanna ka shahr sajta hai

har ek shab na.i duniya basa.i jaati hai

isi ka naam zamane ne rakh liya aansu

ye meri pyaas jo ankhon men aa.i jaati hai

har ek zehn men hota hai rang-e-ḳhak-e-vatan

zamin ki ḳhushbu zamiron men paa.i jaati hai

bachen to kaise bachen apne saa.e se ‘nashir’

badan ki dhuup munDeron tak aa.i jaati hai