ye kah ke raḳhna Daliye un ke hijab men
achchhe bure ka haal khulega naqab men
yarab vo ḳhvab haq men mire ḳhvab-e-marg ho
aae vo mast ḳhvab agar mere ḳhvab men
tahqiq ho to janun ki main kya huun qais kya
likkha hua hai yuun to sabhi kuchh kitab men
main aur zauq-e-bada-kashi le gaiin mujhe
ye kam-nigahiyan tiri bazm-e-sharab men
hain donon misl-e-shisha pa saman-e-sad-shikast
jaisa hai mere dil men nahin hai habab men
ye umr aur ishq hai ‘azurda’ ja-e-sharm
hazrat ye baten phabti thiin ahd-e-shabab men