dil-e-betab ko bahlane chale aa.e hain
ham sar-e-sham hi mai-ḳhane chale aa.e hain
dil ne mushkil se faramosh kiya tha jin ko
lab pe phir aaj vo afsane chale aa.e hain
be-bula.e to yahan rind na aate saaqi
yaad farmaya hai sahba ne chale aa.e hain
rah-e-mai-ḳhana se ghaflat men guzar hi jaate
dekh kar raqs men paimane chale aa.e hain
aaj piine ka irada to nahin tha lekin
baton baton hi men mai-ḳhane chale aa.e hain
Leave a Reply