Azhar Naiyyar
hare daraḳht ka shaḳhon se rishta TuuT gaya
hua chali to gulabon se rishta TuuT gaya
kahan hain ab vo mahakte hue hasin manzar
khuli jo aankh to ḳhvabon se rishta TuuT gaya
zara si der men bimar-e-gham hua ruḳhsat
palak jhapakte hi logon se rishta TuuT gaya
gulab titli dhanak raushni karan jugnu
har ek shai ka nigahon se rishta TuuT gaya
uThi jo sahn men divar iḳhtilaf baḌhe
zamin ke vaste apnon se rishta TuuT gaya
kitab-e-zist ka har safha saada hai ‘nayyar’
qalam ki nok ka lafzon se rishta TuuT gaya
Leave a Reply