Syed Yasir Gilani
tum jo chaho to kahani ye suna dete hain
kis tarah log mohabbat men dagha dete hain
varna ye raz-e-mohabbat to ayaan hota nahin
log kam-zarf ka.i shor macha dete hain
kis tarah un ko falak chhune se rokegi hava
jin parindon ko hare peḌ dua dete hain
main jinhen chhoḌ ke pardes chala aaya huun
raste aaj bhi gaanv ke sada dete hain
gar yaqin aata nahin hai tujhe is vahshat ka
zaḳhm sahra tujhe siine ke dikha dete hain
ye zaruri to nahin dosh hava ka nikle
peḌ ḳhud bhi to parindon ko uḌa dete hain
doston se jo ata hote hain ghaav ‘yasir’
tazkira karte nahin un ka bhula dete hain
Leave a Reply