kinara-dar-kinara mustaqil manjdhar hai yuun bhi
mire paani men jo kuchh hai vo yuun pur-asrar hai yuun bhi
baha jaata huun aksar duur lamhon ke hisaron se
mire Thahrao ke aghosh men raftar hai yuun bhi
kahan ḳhaliyon ke viranon men us ko DhunDne jaa.en
zamanon ka sira mere sire se paar hai yuun bhi
yahan se yuun bhi ik tajrid ki sarhad ubharti hai
aur apne darmiyan anfas ki divar hai yuun bhi
hamare gumbadon ki guunj ka chehra nahin to kya
jo tujh se kah nahin sakte pas-e-iz.har hai yuun bhi
raha kya farq andar aur bahar men ‘riyaz’ aḳhir
jo mujh men kho chuka hai mujh se vo sab paar hai yuun bhi
Leave a Reply