ek pal men zindagi bhar ki udasi de gaya
vo juda hote hue kuchh phuul baasi de gaya
noch kar shaḳhon ke tan se ḳhushk patton ka libas
zard mausam banjh-rut ko be-libasi de gaya
sub.h ke taare miri pahli dua tere liye
tu dil-e-be-sabr ko taskin zara si de gaya
log malbon men dabe saa.e bhi dafnane lage
zalzala ahl-e-zamin ko bad-havasi de gaya
tund jhonke ki ragon men ghol kar apna dhuan
ik diya andhi hava ko ḳhud-shanasi de gaya
le gaya ‘mohsin’ vo mujh se abr banta asman
us ke badle men zamin sadiyon ki pyasi de gaya
Leave a Reply