main lauh-e-arz par nazil hua sahifa huun
dilon pe sabt huun peshaniyon pe likkha huun
purani rut mira muzhda suna ke jaati hai
na.i ruton ke jilau men sada utarta huun
main kaun huun mujhe sab puchhne se Darte hain
main roz ek na.e karb se guzarta huun
main ek zinda haqiqat huun kaun jhuTla.e
jo honT band rahen aankh se chhalakta huun
khuli hava men jo aa.uun to raakh ban ja.un
abhi main zer-e-zamin huun magar ubalta huun
kisi tarah to saveron ki aankh khul jaa.e
main shahr shahr men suraj uTha.e chalta huun
Leave a Reply