kho ga.e yuun kar-ḳhane ya kisi daftar men ham
chhuTTiyon men ajnabi lagte hain apne ghar men ham
fasle se dekhne vaala hamen samjhega kya
pyaas ka sahra hain dariyaon ke pas-manzar men ham
raat ko sone se pahle kya karen us ka hisab
kitne sayon ka ta.aqub kar sake din-bhar men ham
bas hamin ham hain jahan tak kaam karti hai nigah
ek zarra hain magar phaile hain bahr-o-bar men ham
muḳhtalif ḳhakon men chhinTon ki tarah taqsim hain
kya ubhar kar samne aa.en kisi manzar men ham
dusri janib andhera hai to kis ummid par
jagti ankhon ko rakh aa.e shigaf-e-dar men ham
hai ye majburi ki aanch aati hai charon samt se
varna socha tha jiyenge mom ke paikar men ham
haath jis shai ki taraf lapke vo gha.eb ho ga.i
phans ga.e ‘mahir’ ye kis aaseb ke chakkar men ham
Leave a Reply