Main Aasman Pe Bahut Der Rah Nahin Sakta

main asman pe bahut der rah nahin sakta

magar ye baat zamin se to kah nahin sakta

kisi ke chehre ko kab tak nigah men rakkhun

safar men ek hi manzar to rah nahin sakta

ye azmane ki fursat tujhe kabhi mil jaae

main ankhon ankhon men kya baat kah nahin sakta

sahara lena hi padta hai mujh ko dariya ka

main ek qatra huun tanha to bah nahin sakta

laga ke dekh le jo bhi hisab aata ho

mujhe ghata ke vo ginti men rah nahin sakta

ye chand lamhon ki be-iḳhtiyariyan hain ‘vasim’

gunah se rishta bahut der rah nahin sakta

Leave a Comment