jehd-e-paiham ke hasin ḳhabt ko sar men rakhna
paanv thak jaa.en to sochon ko safar men rakhna
rafta rafta vahi ban jaata hai ghar ka malik
kar-e-dushvar hai mehman ko ghar men rakhna
main ḳhata-kar ḳhata hai miri pahchan magar
vasf-e-insan hai farishton ko nazar men rakhna
azm-e-manzil na kahin bojh tale dab jaa.e
zad-e-rah hasb-e-zarurat hi safar men rakhna
bujhte bujhte jo suna jaa.e kahani shab ki
aisa anjum koi aghosh-e-sahar men rakhna
pakne se pahle samar koi zamin-bos na ho
aisa andaz-e-numu tuḳhm-e-shajar men rakhna
jan-leva hai jo shaḳhon pe musallat hai sukut
hausla ḳhaar ka phulon ke nagar men rakhna
Leave a Reply