jazb hai ḳhamshi-e-gul men takallum tera
javedan mere chaman men hai tabassum tera
baagh men sail-e-numu-ḳhez ki halchal teri
dasht men shor-e-sipah-e-mah-o-anjum tera
teri marhun-e-navazish miri sarshari-e-ḳhak
mai-kada tera mai-e-nab tiri ḳhum tera
ḳhushk-o-tar past-o-buland a.ina-e-sham-o-sahr
mehrban sab pe hai sailab-e-tarahhum tera
sab tire zer-e-nagin mauj samundar sahil
badban tera tiri naav talatum tera
chashma-e-ab-e-ravan hai jo sarab-e-jan men
us ki har lahr men raqsan hai tarannum tera
hai tiri miTTi ke har zarre pe ehsan jis ka
‘ishrat’ us zaat men har naqsh hua gum tera
Leave a Reply