masrufiyat usi ki hai fursat usi ki hai
is sarzamin-e-dil pe hukumat usi ki hai
milta hai vo bhi tark-e-taalluq ke bavajud
main kya karun ki mujh ko bhi aadat usi ki hai
jo umr us ke saath guzari usi ki thi
baaqi jo bach gai hai masafat usi ki hai
hota hai har kisi pe usi ka guman mujhe
lagta hai har kisi men shabahat usi ki hai
likkhun to us ke ishq ko likhna hai shairi
sochun to ye suḳhan bhi inayat usi ki hai
dar-e-astan koi ho ba-zahir sar-e-sujud
lekin pas-e-sujud ibadat usi ki hai
vo jis ke haq men jhuti gavahi bhi main ne di
‘ruhi’ mire ḳhilaf shahadat usi ki hai