Poet
dekhne men ye kanch ka ghar hai
raushni aadmi ke andar hai
kaisa ujḌa hua ye manzar hai
ghar ke hote bhi koi be-ghar hai
misl-e-yunus huun batn-e-mahi men
mere charon taraf samundar hai
us ke kya kya suluk dekhe hain
vaqt hi baḳht ka sikandar hai
dekhne men hai vo varaq saada
paḌhne baiThun to ek daftar hai
raushni ho to koi pahchane
kaun rahzan hai kaun rahbar hai
saans lena bhi mo.ajiza hai yahan
zindagi aag ka samundar hai
roz paḌhta huun bhiiḌ ke chehre
sab ke chehre pe ek manzar hai
us ki tasvir kis tarah khinchun
mera mahbub mere andar hai
apni rudad mujh ko yaad nahin
dil ko lekin tamam azbar hai
Leave a Reply