Asar Lakhnavi
nigah-e-shauq ko yuun a.ina-samani de
ishq ko husn bana husn ko hairani de
dil-navazi men bhi iiza hai mohabbat ki qasam
tujh ko fursat jo kabhi shughl-e-sitam-rani de
kuchh tiri chashm-e-suḳhan-saz ka iima na khula
lab-e-mai-nosh ko taklif-e-gul-afshani de
phuul vo hai jo mayassar chaḌhe ye sunta tha
ab khula dil ki rah-e-ishq men qurbani de
aa.ina sang-e-dar-e-dost hua bhi to kya
sar jo sajde men jhuke lau tiri peshani de
uf vo purkar jo sunte hi taghaful ka gila
ishva-o-naz ko ta.alim-e-pashimani de
dil-e-betab-e-tamasha ki tasalli ma.alum
apne har jalve ko ik paikar-e-insani de
us ki angḌa.i ka aalam to kabhi dekh ai gul
aur hi husn tiri chak-garebani de
aao shiraza-e-hasti ko pareshan kar den
yuun ki us zulf ko paigham-e-pareshani de
teri sarkar ghani tera gada bhi hai ghani
kuchh na de aur jo de gham ki faravani de
is tavaqqo pe huun ḳhamosh ki vo shoḳh-nigah
phir Tahoka pa-e-taqrib-e-ghazal-ḳhvani de
Leave a Reply