main apne azaab likh rahi thi
zakhmon ka hisab likh rahi thi
phulon ki zaban ki shaera thi
kanton se gulab likh rahi thi
us ped ke khokhle tane par
ik umr ke khvab likh rahi thi
ankhon se saval padh rahi thi
palkon se javab likh rahi thi
har buund shikasta bam-o-dar par
barish ka itaab likh rahi thi
ik nasl ke khvab ke lahu se
ik nasl ke khvab likh rahi thi
phulon men Dhali hui ye ladki
patthar pe kitab likh rahi thi