Hasan Abbas Raza
zamin sarakti hai phir sa.eban TuTta hai
aur us ke ba.ad sada asman TuTta hai
main apne-ap men taqsim hone lagta huun
jo ek pal ko kabhi tera dhyan TuTta hai
koi parinda sa par kholta hai uḌne ko
phir ik chhanake se ye ḳhak-dan TuTta hai
jise bhi apni safa.i men pesh karta huun
vahi gavah vahi mehrban TuTta hai
na ham men hausla-e-ḳhud-kushi ki mar jaa.en
na ham se qufl-e-dar-e-pasban TuTta hai
zakat-e-ishq agar banTne pe aa ja.un
to ik hujum-e-talab mujh pe aan TuTta hai
jo andhiyan sar-e-sahra-e-hijr uThti hain
un andhiyon men ‘raza’ naḳhl-e-jan TuTta hai
Leave a Reply