Mujhe Baghban Se Gila Ye Hai Ki Chaman Se Be-KHabari Rahi

Qamar Jalalvi

mujhe baghban se gila ye hai ki chaman se be-ḳhabari rahi

ki hai naḳhl-e-gul ka to zikr kya koi shaḳh tak na hari rahi

mira haal dekh ke saqiya koi bada-ḳhvar na pi saka

tire jaam ḳhali na ho sake miri chashm-e-tar na bhari rahi

main qafas ko toḌ ke kya karun mujhe raat din ye ḳhayal hai

ye bahar bhi yuun hi ja.egi jo yahi shikasta-pari rahi

mujhe alam tere jamal ka na ḳhabar hai tere jalal ki

ye kalim jaane ki tuur par tiri kaisi jalvagari rahi

main azal se aaya to kya mila jo main ja.unga to milega kya

miri jab bhi dar-ba-dari rahi miri ab bhi dar-ba-dari rahi

yahi sochta huun shab-e-alam ki na aa.e vo to hua hai kya

vahan ja saki na miri fughan ki fughan ki be-asari rahi

shab-e-va.ada vo jo na aa sake to ‘qamar’ kahunga ye charḳh se

tire taare bhi ga.e ra.egan tiri chandni bhi dhari rahi