arzu-e-visal-e-yar karen
kis ke aane ka intizar karen
dard ke kis maqam se guzren
apna dariya kahan se paar karen
kis se kis moḌ par bichhaḌ jaa.en
kaun sa hijr iḳhtiyar karen
ye jo ik zaḳhm-e-jan pas-e-jan hai
kis ke siine ke ar-par karen
fursat-e-shauq umr-e-avara
aa tujhe aaj sharmsar karen
dil ki unchi machan par baiThen
aur koi aarzu shikar karen
mas.ala ye hai kis havale se
koi ḳhvahish sipurd-e-yar karen
kaash tum roz hi mukar jaao
kaash ham roz intizar karen
chand chhat par zarur aa.ega
meri ankhon ka e’tibar karen
ek mushkil si aa paḌi hai ‘qais’
teri ankhon pe kya nisar karen
Leave a Reply