Ahmad Rahi
mizha-e-khar pe kis tarah bhala paae qarar
ariz-e-gul pe na jab qatra-e-shabnam thahre
hadsa hai ki dar aai ye masarrat ki kiran
varna is dil pe the tariki-e-gham ke pahre
dard-e-mahrumi-e-javed hamari qismat
rahat-e-vasl-o-mulaqat ke dar band rahe
sal-ha-sal rivayat ke zindanon men
kitne biphre hue jazbat nazar-band rahe
sim-sim-e-sim se khul jaate hain uqdon ke pahad
jagmaga uthte hain phulon ke diye sahra men
ghaza-e-zar se hai rukhsar-e-tamaddun ka nikhar
dil to ik jins-e-faromaya hai is duniya men
chadhte suraj ke parastar hain duniya vaale
dubte chand ko bin dekhe guzar jaate hain
kaun juude men sajata hai bhala dhuul ke phuul
shakh ke khaar bhi ankhon men jagah paate hain
tu miri hai ki yahan koi nahin tha mera
main tira huun ki tujhe koi bhi apna na saka
kitni pyari hai suhani hai ye duniya jis men
tu bhi thukrai gai mujh ko bhi thukraya gaya
Leave a Reply