ik faqat ḳhud se gila baaqi raha
varna is dil men to kya baaqi raha
ik taraf teri kami khalti rahi
ik taraf apna ḳhala baaqi raha
raah ki asaniyan jaati rahin
manzilon ka marhala baaqi raha
zindagi-dar-zindagi chalti rahi
mas.ala-dar-mas.ala baaqi raha
ham had-e-idrak se majbur the
ham se jo tha mavara baaqi raha
ho rahenge ham bhi us ke ek din
haan agar dil men ḳhuda baaqi raha
shahr-e-dil ke ba-vafa jab kho ga.e
aḳhirash ik be-vafa baaqi raha
dil se teri yaad bhi ruḳhsat hui
aur ab kya mo.ajiza baaqi raha
ai dil-e-nakam kuchh to kar guzar
ya abhi kuchh sochna baaqi raha
Leave a Reply