Jitni Bhi Tez Ho Sake Raftar Kar Ke Dekh

Zuhoor Ul Islam Javed

jitni bhi tez ho sake raftar kar ke dekh

phir apni ḳhvahishon ko giraftar kar ke dekh

divana hai junun men guzarta hi ja.ega

tu raston ko chahe to divar kar ke dekh

yusuf bhi hai yahan pe zuleḳha-e-vaqt bhi

bas misr ki si garmi-e-bazar kar ke dekh

ai mohtasib rivayat-e-kuhna ke naqsh men

ta.amir karta ja.unga mismar kar ke dekh

shayad isi men saare masa.il ka hal mile

sardar hai jo us ko sar-e-dar kar ke dekh

‘javed’ gar hai ḳhvahish-e-taskin-e-qalb-o-jan

ruḳh apna janib-e-shah-e-abrar kar ke dekh