Jitni Bhi Tez Ho Sake Raftar Kar Ke Dekh

jitnī bhī tez ho sake raftār kar ke dekh

phir apnī ḳhvāhishoñ ko giraftār kar ke dekh

dīvāna hai junūñ meñ guzartā hī jā.egā

tū rāstoñ ko chāhe to dīvār kar ke dekh

yūsuf bhī hai yahāñ pe zuleḳhā-e-vaqt bhī

bas misr kī sī garmī-e-bāzār kar ke dekh

ai mohtasib rivāyat-e-kuhna ke naqsh meñ

ta.amīr kartā jā.ūñgā mismār kar ke dekh

shāyad isī meñ saare masā.il kā hal mile

sardār hai jo us ko sar-e-dār kar ke dekh

‘jāved’ gar hai ḳhvāhish-e-taskīn-e-qalb-o-jāñ

ruḳh apnā jānib-e-shah-e-abrār kar ke dekh

Leave a Comment