Nazm Tabatabai
junun ke valvale jab ghuT ga.e dil men nihan ho kar
to uTThe hain dhuan ho kar gire hain bijliyan ho kar
kuchh aage baḌh chale saman-e-rahat la-makan ho kar
falak pichhe raha jaata hai gard-e-karvan ho kar
kisi din to chale ai asman bad-e-murad aisi
ki utren kashti-e-mai par ghaTa.en badban ho kar
na jaane kis bayaban marg ne miTTi nahin paa.i
bagule ja rahe hain karvan-dar-karvan ho kar
vafur-e-zabt se betabi-e-dil baḌh nahin sakti
gale tak aa ke rah jaate hain naale hichkiyan ho kar
gulu-gir ab to aisa inqalab-e-rang-e-alam hai
ki naghme nikle minqar-e-anadil se fughan ho kar
jo ho kar abr se mayus ḳhud sinche kabhi dahqan
jala den khet ko paani ki lahren bijliyan ho kar
jahan men vashud-e-ḳhatir ke saman ho ga.e lashe
jagah rahat ki na-mumkin hui hai la-makan ho kar
hanse koi na bijli ke siva is dar-e-matam men
agar rah jaa.e saara khet kisht-e-za.afaran ho kar
alam men ashiyan ke is qadar tinke chune main ne
ki aḳhir ba.is-e-taskin hue hain ashiyan ho kar
ghaTa.en ghir ke kya kya hasrat-e-farhad par roiin
chaman tak aa ga.iin nahren pahaḌon se ravan ho kar
dil-e-shaida ne paaya ishq men me.araj ka rutba
yahan akasr buton ke zulm TuuTe asman ho kar
jo Darte Darte dil se ek harf-e-shauq nikla tha
vo us ke samne aaya zaban par dastan ho kar
nikal aa.e hain har iqrar men inkar ke pahlu
bana deti hain hairan teri baten makr yaan ho kar
nazakat ka ye aalam phuul bhi toḌe to bal kha kar
na jaane dil mira kis tarah toḌa pahlvan ho kar
tadarrau-o-kabak par hans kar uTThe ḳhud laḌkhaḌate hain
subuk karte hain un ko pa.enche bar-e-giran ho kar
gala ghonTa hai zabt-e-gham ne kuchh aisa ki mushkil hai
ki nikle munh se avaz-e-shikast-e-dil fughan ho kar
pata andesha-e-salik ne paaya manzil-e-dil ka
tu palTa la-makan se asman-dar-asman ho kar
hui phir dekhiye aa bustan-e-shadi-o-gham duniya
abhi paida hue the ranj-o-rahat to amaan ho kar
jo nikli hogi koi aarzu to ye bhi niklega
tumhara tir-e-hasrat ban gaya dil men nihan ho kar
utar ja.ega tu o aftab-e-husn koThe se
girega saya-e-divar ham par asman ho kar
Leave a Reply