Firaq-O-Hijr Ke Lamhe Jo Tal Gae Hote

firaq-o-hijr ke lamhe jo Tal ga.e hote

hamare zehn ke ḳhake badal ga.e hote

vo maslahat ka taqaza agar samajh jaata

tamam shahr ke lahje badal ga.e hote

agar sharik-e-safar vo bhi ho gaya hota

tamazaton ke ye suraj bhi Dhal ga.e hote

qadam uTha.e hain kuchh soch kar mohabbat men

sanbhalna hota hamen to sanbhal ga.e hote

vafa-pasand agar vo bhi ho gaya hota

hamare raste kitne badal ga.e hote

jo thoḌi der na aata ḳhayal-e-tanha.i

tumhare shahr ki had se nikal ga.e hote

‘nazar’ ko mohlat-e-nazzargi agar milti

nigah-e-shauq ke arman nikal ga.e hote