andhiyon se hain rabte us ke
jal rahe hain sabhi diye us ke
ḳhushbuen kar rahi hain us ka tavaf
baagh sab hain hare-bhare us ke
vo sarapa hai aftab-e-jamal
kaun Thahrega samne us ke
mujh se pahchante hain log us ko
aks mere hain aa.ine us ke
main kitab us ki zindagi ki huun
mujh men raushan hain hashiye us ke
shab ke zindan men qaid hai vo magar
hain ujalon se rabte us ke
us ke har zaviye se vaqif huun
main ne khinche hain za.iche us ke
aaj tak naam de saka na koi
hain ta.alluq ajab mire us ke
Leave a Reply