saval chhoḌ ki halat ye kyuun bana.i hai
use na sun jo kahani suni-suna.i hai
patanga sham.a pe marta hai kya bura.i hai
use kisi ne bhi roka hai jis ki aa.i hai
hanse hain gul na kali koi muskura.i hai
huzur kaise ye kah duun bahar aa.i hai
zarur koi alamat qaza ki paa.i hai
mujhe azizon ne surat tiri dikha.i hai
na jaane hijr ki raat aur miri siyah-baḳhti
kahan kahan ke andhere sameT laa.i hai
lahad se kab uThen dekho musafiran-e-adam
safar hai duur ka raste men niind aa.i hai
asiir kya kahen sayyad ye to samjha de
qafas men bu-e-chaman puchhne ko aa.i hai
mujhe na chheḌ qayamat hai meri aahon men
ḳhuda rakhe tiri mahfil saji-saja.i hai
Leave a Reply