Ahmad Hamdani
dil tujhe pa ke bhi tanha hota
duur tak hijr ka saaya hota
aur to apne liye kya hota
apna dukh hi koi apna hota
aap aate ki na aate dil men
jalta-bujhta koi shoala hota
aarzu phir nai karte taabir
phir naya koi tamasha hota
phir vahi ek khalish si hoti
phir kisi ne hamen dekha hota
zakhm phir koi mahakta dil men
samne phir koi chehra hota
phir gale vahshaten miltin ham se
phir vahi ham vahi sahra hota
the khafa tum to hamara dam-saz
afat-e-jan koi tum sa hota
tujh ko nafrat hai to apna dil bhi
rafta rafta tujhe bhula hota
thak ke soya hai jo ab raat gae
shaam hote use dekha hota
Leave a Reply