Log laDte Rahe Nam Aae Talab-Garon Mein

log laḌte rahe naam aa.e talab-gāroñ meñ

ham ki chup-chāp khaḌe the tire bīmāroñ meñ

zulm ke ham haiñ muḳhālif magar ik din ke liye

shor har roz nayā uThtā hai aḳhbāroñ meñ

āj-kal shikva-e-nāpaid hai jis ġhairat kā

ḳhuub biktī hai mire shahr ke bāzāroñ meñ

faḳhr kyā kam hai ki nīlāmī-e-yūsuf meñ ‘na.īm’

tahī-dāmāñ the magar the to ḳharīdāroñ meñ

Leave a Comment