abru-e-abr se karta hai ishara mujh ko
jhalak us aankh ki dikhla ke sitara mujh ko
huun main vo sham.a sar-e-taq jala kar sar-e-sham
bhuul jaata hai mira anjuman-ara mujh ko
ra.egan vus.at-e-viran men ye khilte hue phuul
un ko dekhun to ye dete hain sahara mujh ko
meri hasti hai faqat mauj-e-hava naqsh-e-habab
koi dam aur karen aap gavara mujh ko
daam phailati rahi sud-o-ziyan ki ye bisat
haan magar mere junun ne nahin haara mujh ko
kuchh shab-o-roz-o-mah-o-sal guzar kar mujh par
vaqt ne ta-ba-abad ḳhud pe guzara mujh ko
mauj-e-be-tab huun main mere anasir hain kuchh aur
chahiye sohbat-e-sahil se kinara mujh ko
rizq se mere mire dil ko hai ranjish ‘ḳhurshid’
asmanon se zaminon pe utara mujh ko
Leave a Reply