hisar-e-maqtal-e-jan men lahu lahu main tha
rasan rasan miri vahshat gulu gulu main tha
jo rah gaya nigah-e-sozan-e-mashiyyat se
qaba-e-zist ka vo chak-e-be-rafu main tha
zamana hansta raha meri ḳhud-kalami par
tire ḳhayal se masruf-e-guftugu main tha
tha aa.ine men shikast-e-ghurur-e-yakta.i
ki apne aks ke parde men hu-ba-hu main tha
tu apni zaat ke har pech-o-ḳham se puchh ke dekh
qadam qadam miri aahaT thi ku-ba-ku main tha
har ek vadi-o-kohsar se guzarta hua
jo abshar bana tha vo aabju main tha
ḳhutan ḳhutan thi shalang-e-ghazal mere liye
badan badan mira nashsha subu subu main tha
tamam umr ki divangi ke ba.ad khula
main teri zaat men pinhan tha aur tu main tha
ma.al-e-umr-e-mohabbat hai bas yahi ’tishna’
miri talash tha vo us ki justuju main tha
Leave a Reply