Dariya Nazar Na Aae Na Sahra Dikhai De

dariyā nazar na aa.e na sahrā dikhā.ī de

josh-e-junūñ ho jis ko use kyā dikhā.ī de

maiñ aa gayā kahāñ ki ye hasrat nazar ko hai

ai kaash is jagah koī apnā dikhā.ī de

ḳhandāñ-jabīñ laboñ pe hañsī pur-ḳhulūs dil

daur-e-tarab meñ koī to aisā dikhā.ī de

ḳhvāhāñ haiñ vo ki saarā zamāna ho un ke saath

auroñ ko chāhte haiñ ki tanhā dikhā.ī de

‘aḳhtar’ ko dekhte nahīñ achchhī nazar se aap

phir bhī ye chāhte haiñ ki achchhā dikhā.ī de

Leave a Comment