Razi Akhtar Shauq
jis pal main ne ghar ki imarat ḳhvab-asar bana.i thi
us lamhe virani ne bhi ik raftar bana.i thi
ham ne hi mahr ko zahr se badla varna zamin ki gardish ne
din gham-ḳhvar banaya tha aur shab dildar bana.i thi
TuuTe dil palkon se sambhalen ab aise fankar kahan
varna ye duniya jab ujḌi thi sau sau baar bana.i thi
apni raah ke saare kanTe main ne aap hi bo.e the
varna ḳhvab-e-azal ne duniya kam-azar bana.i thi
kucha kucha matam hoga galiyon galiyon vavaila
is par pahle kyuun nahin socha jab dastar bana.i thi
kab tak ek hi manzar chunte apni ana ke zindani
aaj usi men dar mangen hain jo divar bana.i thi
Leave a Reply