yunhi baithe raho bas dard-e-dil se be-khabar ho kar
bano kyuun charagar tum kya karoge charagar ho kar
dikha de ek din ai husn-e-rangin jalva-gar ho kar
vo nazzara jo in ankhon men rah jaae nazar ho kar
dil-e-soz-ashna ke jalve the jo muntashir ho kar
faza-e-dahr men chamka kiye barq o sharar ho kar
vahi jalve jo ik din daman-e-dil se gurezan the
nazar men rah gae gul-ha-e-daman-e-nazar ho kar
falak ki samt kis hasrat se takte hain maaz-allah
ye naale na-rasa ho kar ye aahen be-asar ho kar
ye kis ke husn ke rangin jalve chhae jaate hain
shafaq ki surkhiyan ban kar tajalli ki sahar ho kar
Leave a Reply