pahle jaisa nahin raha huun
main andar tak TuuT gaya huun
jaise kaghaz phaT jaata hai
do TukḌon men paḌa hua huun
dost mira kyuun saath nibhate
jab main un ko chhoḌ chuka huun
kitna chhoTa sa lagta huun
duur se ḳhud ko dekh raha huun
shishe ki divaron vaale
ik kamre men qaid paḌa huun
logon ke zahir batin ko
dekhta huun hansta rahta huun
tasviron ka qaht paḌa hai
aur main rang baha baiTha huun
koi mera haal na puchhe
main jaisa bhi huun achchha huun
Leave a Reply