Riyasat Ali Taj
ḳhayal-o-fikr jahan zaviye badalte hain
vahin se nit-na.e uslub chal nikalte hain
vo raat ko pa.e gul-gasht jab nikalte hain
falak pe chand-sitaron ke dil machalte hain
mire kalam men mafrōza-o-qayas nahin
ye tajrabat hain jo sher ban ke Dhalte hain
ruḳh-e-hayat ko har zaviye se dekha hai
mushahidat ke qalib men sher Dhalte hain
qadam qadam pe Haya-soziyon ka aalam hai
sanvar sanvar ke nigaran-e-shahar chalte hain
tumhare gham se ibarat hai zindagi meri
tumhare yaad ke dil men charagh chalte hain
hain kamran vahi log aaj duniya men
jo vaqt aur zamane ke saath chalte hain
gudaz-e-qalb bhi hota hai kuchh unhin ko nasib
jo dard-mand hain un ke hi dil pighalte hain
rah-e-hayat men aisa bhi hai maqam koi
jahan jujun-o-ḳhirad saath saath chalte hain
juda hai rang-e-suḳhan ‘taj’ har suḳhan-var ka
ba-etebar-e-nazar, fikr-o-fan badalte hain
Leave a Reply