Navneet Sharma
siine men mire bojh bhi aur dahka chaman bhi
kya chiiz tiri yaad hai ḳhushbu bhi ghuTan bhi
pahle to tamanna thi tiri sirf magar ab
ankhon men nazar aane lagi meri thakan bhi
hai ishq safar dil se faqat dil ka magar kyuun
is raah men aate hain bayaban bhi chaman bhi
jo dil pe guzarti hain raqam kar use dil par
zaḳhmon ki numa.ish na bane bazm-e-suḳhan bhi
tapti hui dharti ko mire chhalon ne sincha
kuchh kaam to aaya hai chalo bavla-pan bhi
hairat hai, mujhe saans vahin aati hai janan
ghuT jaana sikha.e jahan yadon ki pavan bhi
kumhlaya zara rang to vo soch men Duube
aahon se mila karta hai kuchh sanvala-pan bhi
pairon ke tale se kahin miTTi na khisak jaa.e
zid hai miri muTThi men ho dharti bhi gagan bhi
mahbub ke chehre ke muqabil bhi raha par
is daur men aaya to hua chand mission bhi
‘navnit’ tu hai fazl ki uncha.i ka hissa
rakh dil men agar nuur to rakh zehn men fan bhi
Leave a Reply