ajab nuqush hain chehra to aisa tha hi nahin
ye mera aks nahin hai ki aa.ina hi nahin
likhun vo baat ki shiddat se ho tujhe mahsus
mire qalam men shab-e-hijr ki siyahi nahin
phira raha hai zamane se raston ka tilism
gharib-e-shahr abhi mo’atabar hua hi nahin
khurach le zehn se saare ta.assurat ki ab
tiri bahar ka mausam to aa.ega hi nahin
hazar qurb ki ḳhushbu ne baat ki ‘ash.har’
vo kya safar tha musafir to kuchh khula hi nahin
Leave a Reply