vafa ka shauq ye kis intiha men le aaya
kuchh aur daagh main apni qaba men le aaya
mire mizaj mire hausle ki baat na kar
main ḳhud charagh jala kar hava men le aaya
dhanak libas ghaTa zulf dhuup dhuup badan
tumhara milna mujhe kis faza men le aaya
vo ek ashk jise ra.egan samajhte the
qubuliyat ka sharaf vo dua men le aaya
falak ko chhoḌ ke ham dar-ba-dar na the ‘shahbaz’
zamin se TuTna ham ko ḳhala men le aaya
Leave a Reply