Najeeb Ahmad
asman suraj sitare bahr-o-bar kis ke liye
ye safar kis ke liye raḳht-e-safar kis ke liye
vo hare din vo bhare mausam to kab ke ja chuke
haath phaila.e khaḌe hain ab shajar kis ke liye
din nikalte hi nikal aa.e the kis ki khoj men
shaam Dhalte hi chale aa.e hain ghar kis ke liye
tu kisi ka muntazir kab tha magar ye to bata
umr-bhar dil ka khula rakkha hai dar kis ke liye
kaun dariyaon ki haibat oḌh kar nikla ‘najib’
chiḳh uTThe hain samundar men bhanvar kis ke liye
Leave a Reply