ham kahan aur dil-e-ḳharab kahan
ai shab-e-gham tira javab kahan
zindagi ke shu.ur se baḌh kar
zindagi men koi azaab kahan
koi chehra ho ghaur se paḌhiye
is se jame.a koi kitab kahan
dard-o-gham ki udaas ankhon men
aarzu ke hasin ḳhvab kahan
aao apni sahar se puchh to len
chhoḌ aa.i hai aftab kahan
ruuh jab ho ga.i hai ḳhud ghayal
dil ke zaḳhmon ka phir hisab kahan
dil dhaḌakte hain ab magar dil men
vo mahakte hue gulab kahan
kya pata vaqt ke andheron men
chhap ga.e fan ke mahtab kahan
vaqt Thahra hua sa lagta hai
ruk gaya aa ke inqalab kahan
ai ‘ra.is’ aarzu ke chehre par
ab vo agli si ab-o-tab kahan
Leave a Reply