Bashar Nawaz
kya kya log khushi se apni bikne par tayyar hue
ek hamin divane nikle ham hi yahan par khvar hue
pyaar ke bandhan khuun ke rishte tuut gae khvabon ki tarah
jagti ankhen dekh rahi thiin kya kya karobar hue
aap vo syane raste ke har patthar ko but maan liya
ham vo pagal apni raah men aap hi khud divar hue
apni apni jagah par donon be-bas bhi masrur bhi hain
tum tahrir-e-sang hue ham bhula hua iqrar hue
aane vaali subh ginegi raat ke andhe tufan men
kitne sahil hi par duube kitne bhanvar ke paar hue
Leave a Reply