Meena Khan
yuun aap jo asuda-e-gham karte rahenge
ham dard-e-dil-o-jan ko kam karte rahenge
samjhe the ki vo shikve gile bhuul ga.e hain
ma.alum na tha dil pe raqam karte rahenge
rakkhenge tire gham ko zamane se chhupa kar
tanha.i men ham aankh ko nam karte rahenge
azar pe azar diye ja.enge hans kar
har haal men vo ham pe karam karte rahenge
kya apni haqiqat hai siva teri ata ke
ham ḳhud ko tiri zaat men zam karte rahenge
jazbat se me.aar se ya ḳhun-e-jigar se
ham parvarish-e-lauh-o-qalam karte rahenge
iman ki daulat hai kahin kufr ka ghalba
sab zikr-e-ḳhuda zikr-e-sanam karte rahenge
halat na badlen na sahi phir bhi ai ‘mina’
koshish to magar ahl-e-qalam karte rahenge
Leave a Reply