Marghoob Asar Fatmi
ab koi hujjat nahin iqrar ko inkar se
ishq ne paali faraghat husn ki sarkar se
is ada-e-be-niyazi par hai hairan aankh bhi
aa ga.e dil men magar puchha na pahre-dar se
gard-aluda thiin ankhen intizar-e-dost men
dhul rahi hain vasl men vo ansuon ki dhaar se
vapsi hogi vahin par is ka andaza na tha
nachta nanga chala tha aadmi jab ghaar se
lafz men jaadu nahin hai ik haqiqat hai janab
ham hifazat kar rahe hain kaghzi talvar se
nikhat-o-shadabi-e-gul hai chaman ka imtiyaz
aadmi pahchana jaata hai faqat kirdar se
mujh se us ki bad-gumani garche poshida nahin
baat banti hai ‘asar’ ki bahami guftar se
Leave a Reply