Ghulam Mohammad Qasir
ḳhvab kahan se TuuTa hai tabir se puchhte hain
qaidi sab kuchh bhuul gaya zanjir se puchhte hain
jam-e-jam laaya hai ghar ghar duniya ke halat
dil ki baten ham teri tasvir se puchhte hain
duniya kab karvaT badlegi kab jagenge shahr
kaisi baten so.e hue zamir se puchhte hain
ham se na puchho kis jazbe ne tumhen kiya nakam
badshah aisi baten apne vazir se puchhte hain
ahd se kaun mukar ja.ega taron ko kya ilm
likkhi nahin jo tu ne us tahrir se puchhte hain
‘qasir’ ne to dekha hai ab tak faqon ka raqs
jauhri taqat kya hai jauhar-e-‘mir’ se puchhte hain
Leave a Reply